நிலவில் 4ஜி செல்லுலார் நெட்வொர்க் வசதி வழங்க நோக்கியா நிறுவனம் அனுமதி பெற்று இருக்கிறது. மேலும் இதற்கான பணிகளை துவங்க நோக்கியா நிறுவனத்திற்கு நாசா சார்பில் 1.4 கோடி அமெரிக்க டாலர்கள் வழங்கப்பட்டு உள்ளது.
நிலவில் 4ஜி நெட்வொர்க் கட்டமைக்க மொத்தத்தில் 37 கோடி அமெரிக்க டாலர்கள் மதிப்பில் திட்டமிடப்பட்டு உள்ளது. இந்த திட்டத்தில் விண்வெளி ஆய்வில் முன்னிலை பெறுவது மற்றும் அடுத்தக்கட்ட பணிகளை துவங்குவது போன்றவை மேற்கொள்ளப்பட இருக்கின்றன.
நோக்கியா சார்பில் உருவாக்கப்படும் தொழில்நுட்பம், நிலவின் மேற்பரப்பில் தொலைதூர தகவல் பரிமாற்றங்களை அதிவேகமாகவும், தற்போதைய சூழலைவிட சீராக மேற்கொள்ளவும் வழி செய்கிறது.
2028 ஆம் ஆண்டு வாக்கில் நிலவில் விண்வெளி வீரர்கள் பணிகளை மேற்கொள்ள செய்யும் திட்டத்தை நிறைவேற்ற விரைவில் புதிய தொழில்நுட்பங்களை உருவாக்க வேண்டும் என நாசா அதிகாரி ஜிம் பிரைட்ஸ்டைன் தெரிவித்து இருக்கிறார்.
நோக்கியாவின் ஆராய்ச்சி பிரிவு பெல் லேப்ஸ், லூனார் ரோவர்களை வயர்லெஸ் முறையில் இயக்குவது, நேவிகேஷன் மற்றும் வீடியோ ஸ்டிரீமிங் உள்ளிட்ட வசதிகளை வழங்க பணியாற்றி வருவதாக தெரிவித்து உள்ளது.