இந்திய சினிமாவின் முன்னணி இயக்குனர்களாக கருதப்படுபவர் வெற்றிமாறன். இவர் இதுவரை தமிழில் இயக்கிய பொல்லாதவன், ஆடுகளம், விசாரணை, வடசென்னை, அசுரன் ஆகிய 5 படங்களுமே மாபெரும் வெற்றி பெற்றவை.
இந்த நிலையில், தமிழில் மட்டும் நேரடி படங்களை இயக்கிய வெற்றிமாறன் தெலுங்கில் கால்தடம் பதிக்க உள்ளார். தெலுங்கு திரையுலகின் உச்ச நட்சத்திரங்களில் ஒருவரான ஜூனியர் என்.டி.ஆர். நடிக்கும் புதிய படத்தை வெற்றிமாறன் இயக்க உள்ளார். இது இருவருடைய ரசிகர்களுக்கும் உற்சாகத்தையும், எதிர்பார்ப்பையும் ஏற்படுத்தியுள்ளது.
ஆர்.ஆர்.ஆர். படத்தின் பிரம்மாண்ட வெற்றியால் ஜூனியர் என்.டி.ஆர். புகழ் ஆஸ்கர் வரை சென்றுள்ளது. இந்த நிலையில், அவர் நடிக்கும் அடுத்த படத்தை தெலுங்கின் முன்னணி இயக்குனர் கொரட்டலா சிவா இயக்குகிறார். அடுத்ததாக அவர் கே.ஜி.எஃப். படத்தை இயக்கிய பிரசாந்த் நீல் படத்தில் நடிக்கிறார். இதற்கு அடுத்ததாகவே ஜூனியர் என்.டி.ஆர். படத்தை வெற்றிமாறன் இயக்க உள்ளதாக தகவல்கள் வெளியாகியுள்ளது.
மேலும், வெற்றிமாறன் இயக்கும் இந்த படத்தின் கதை 3 பாகங்களாக உருவாக உள்ளதாகவும், முதல் பாகத்தில் ஜூனியர் என்.டி.ஆர். நாயகனாகவும், 2வது பாகத்தில் தனுஷ் நாயகனாகவும் நடிக்க உள்ளதாகவும் தகவல்கள் வெளியாகியுள்ளது. மூன்றாவது பாகத்தில் இருவரும் இணைந்து நடிக்கவும் வாய்ப்பு உள்ளதாக தகவல்கள் வெளியாகியுள்ளது.
ஜூனியர் என்.டி.ஆர். – வெற்றிமாறன் – தனுஷ் கூட்டணி ரசிகர்கள் மத்தியில் மிகுந்த எதிர்பார்ப்பையும், வரவேற்பையும் ஏற்படுத்தியுள்ளது என்றே கூறலாம்.