வட இந்தியர்களின் உணவுகளிலே சப்பாத்தியை போன்றே மிகவும் ருசியான உணவு நாண் ஆகும். தமிழ்நாட்டில் கூட வட இந்தியர்களின் நாண் சாப்பிட ஏராளமான மக்கள் உள்ளனர். இந்த சுவையான நாணை வீட்டிலே செய்வது எப்படி என்பதை கீழே விரிவாக காணலாம்.
தேவையான பொருட்கள்:
மைதா மாவு – 1 கப்
கோதுமை மாவு – 1 கப்
சர்க்கரை – 1 ஸ்பூன்
பேக்கிங் சோடா – ½ ஸ்பூன்
பேக்கிங் பவுடர் – ½ ஸ்பூன்
தயிர் – ¼ கப்
உப்பு – தேவையான அளவு
செய்வது எப்படி?
• முதலில் ஒரு பவுலை எடுத்துக் கொள்ள வேண்டும்.
• அதில் மைதா மாவு, கோதுமை மாவு, சர்க்கரை, பேக்கிங் சோடா, பேக்கிங் பவுடர், தயிர், உப்பு, எண்ணெய் இவையெல்லாம் சேர்த்த பிறகு தண்ணீர் ஊற்றாமல் முதலில் மாவை பிசைய வேண்டும்.
• அடுத்து லேசாக தண்ணீர் தெளித்து சப்பாத்தி மாவு பதத்திற்கு இந்த மாவை பிசைய வேண்டும்.
• பரோட்டாவுக்கு செய்வதை போல் மாவை அடித்து பிசையக்கூடாது.
• பிசைந்த இந்த மாவின் மேலே லேசாக எண்ணெய் தடவி 1 மணி நேரம் வரை மூடி போட்டு மூடி வைத்து விடுங்கள்.
• அடுத்து 1 மணி நேரம் கழித்து மாவை ஒரு மீடியம் சைஸ் உருண்டைகளாக உருட்ட வேண்டும்.
• இதை சப்பாத்தி, பூரி செய்வது போல் மொத்தமாக மாவை உருட்டி வைத்துக் கொண்டு செய்ய முடியாது. ஒவ்வொன்றாக தான் செய்ய வேண்டும்.
• இப்போது சப்பாத்தி கட்டையில் மாவை கை வைத்து லேசாக அழுத்தி அதன் மேல் எள், கொஞ்சம் கொத்தமல்லி தழைகளை தூவி அழுத்திய பிறகு மாவை திருப்பி வைத்து சப்பாத்தி உருட்டுவது போல உருட்டுங்கள்
• இதை வட்டமாக திரட்டாமல் கடைகளில் இருக்கும் நாண் போல ஓவல் சைஸில் உருட்ட வேண்டும். மாவை திரட்டும் போது மேலே கொஞ்சம் கோதுமை மாவு அல்லது மைதா மாவு ஏதாவது ஒரு மாவை சேர்த்து உருட்டினால் சரியாக வரும்.
• உருட்டி தயாராக வைத்துள்ள மாவின் மீது லேசாக தண்ணீர் தெளித்து பரவலாக தேய்த்து விடுங்கள். அதற்குள் அடுப்பை பற்ற வைத்து தோசை கல்லை சூடாக்க வேண்டும்.
• தோசைக் கல் நல்ல சூட்டுடன் இருக்கும் போது தண்ணீர் தேய்த்த பக்கத்தை தோசை கல்லில் ஒட்டி விட வேண்டும். அதன் பிறகு ஒரு மூடி போட்டு ஒரு நிமிஷம் வரை வேக விடுங்கள்.
• பிறகு மூடியை எடுத்து விட்டு அடுப்பை மிதமான தீக்கு மாற்றி அப்படியே தோசை கல்லை அடுப்பின் பக்கமாக திரும்பி காட்டுங்கள்.
• நாண் பர்பெக்டாக ஹோட்டல் செய்யப்படுவதை போல மேலே உப்பி அழகாக வந்து விடும்.
• கடைசியாக மேல கொஞ்சம் பட்டர் தடவி எடுத்து விடுங்கள்.
கடைகளில் வருவது போல அருமையான நாண் இப்போது தயார். வீடுகளில் உள்ளவர்களுக்கு கொடுத்து மகிழுங்கள்.